Connect with us

SOCIAL

चोरीको आरोपमा कुटपिट गर्दा मृत्यु : पाँचजना प्रहरी नियन्त्रणमा

Avatar

Published

on

कुटपिटबाट मृत्यु भएका काभ्रेको कुसादेवी घर बताउने कृष्ण गुरुङ । तस्बिर : महानगरीय प्रहरी परिसर भक्तपुर

भक्तपुर । पानी तान्ने मेसिन चोरी गरेको भन्दै कुटपिट गरिँदा ती व्यक्तिको मृत्यु भएको छ । घाइते चोरको मृत्यु भएपछि कुटपिटमा संलग्न पाँचजनालाई भक्तपुर प्रहरीले नियन्त्रणमा लिएको छ ।
महानगरीय प्रहरी परिसर भक्तपुरका प्रवक्ता प्रहरी नायब उपरीक्षक दीपक गिरीले कुटपिटबाट पानी तान्ने मेसिन चोरी गर्ने आफूलाई काभ्रेको कुसादेवी निवासी कृष्ण गुरुङ भन्ने व्यक्तिको उपचारको क्रममा मृत्यु भएको जानकारी दिए ।
निजका आफन्त प्रहरीको सम्पर्कमा नआइसकेकाले मृतकको पूर्ण विवरण प्राप्त हुन नसकेको उनले बताए ।
उनका अनुसार चोरी गर्ने व्यक्तिलाई कुटपिट गर्ने कार्यमा संलग्न भएको आशंकामा पाँचजनालाई प्रहरीले नियन्त्रणमा लिएको छ । प्रहरीले भक्तपुरको चाँगुनारायण नपा २ बस्ने ५० वर्षीय टेकबहादुर केसी, ३२ वर्षीय नवीन कोजू, भक्तपुर नपा ७ बस्ने ३७ वर्षीय विनोद लाखा, दोलखाको भीमेश्वर नपा ९ घर भई हाल चाँगुनारायण नपा २ बस्ने ३८ वर्षीय कमल खत्री फुँयाल र सुनसरीको बर्जु गापा ३ घर भई हाल चाँगुनारायण नपा ३ बस्ने ३४ वर्षीय सनिसकुमार रायलाई नियन्त्रणमा लिएको छ ।
प्रहरीका अनुसार गुरुङले चैत २१ गते मध्यराती करिब साढे ११ बजेतिर चाँगुनारायण नपा २ बर्खेपाटीस्थित च्याउखेतीको लागि प्रयोगमा ल्याउने पोखरीको पानी तान्ने पम्प चोरी गर्ने प्रयास गर्दै थिए । पानी तान्ने पम्प चोरी गर्न लागेकै बखत विनोद लाखालगायतले देखेर उनलाई नियन्त्रणमा लिएर कुटपिट गरेको प्रहरीलाई जानकारी आएको प्रहरी नायब उपरीक्षक गिरीले जानकारी दिए ।
‘प्रहरीलाई जानकारी आएपश्चात कुटपिट नगर्नु होला भनी सूचना दिने व्यक्तिलाई अनुराध गरी प्रहरी टोली पुग्दा निर्घात कुटपिट गरिसकेको पाइयो’, उनले थपे, ‘नाकबाट रगत बगेको घाइते अवस्थामा रहेकालाई तत्काल उपचारको लागि शुक्रबार राति नै भक्तपुर अस्पताल पु-याइएको थियो ।’
उनका अनुसार घाइतेको साथबाट मादक पदार्थको गन्ध पनि आइरहेको थियो ।
उपचारकै क्रममा आइतबार घाइते गुरुङको मृत्यु भएको उनले बताए ।
सम्बन्धित चिकित्सकले दिमागमा रक्तश्राब भई घाइतेको मृत्यु भएको जानकारी दिएको प्रहरी नायब उपरीक्षक गिरीले जानकारी दिए ।
कुटपिटबाटै गुरुङको मृत्यु भएको देखिएकाले अनुसन्धानका लागि पानी तान्ने मोटर चोरी गर्दै गरेको अवस्थामा फेला पारी कुटपिट गरी गम्भीर घाइते बनाई प्रहरीलाई खबर गर्ने पाँच जनालाई नियन्त्रणमा लिएको प्रहरीले जनाएको छ ।
काभ्रेको कुसादेवी घर बताउने मृतक गुरुङको उचाइ ५ फिट १ इन्च, छोटो कपाल, पातलो शरीर, निधारको बायाँतर्फ पुरानो घाउको खत, आकाशे निलो रंगको सर्ट, खैरो रंगको कपडाको पाइन्ट लगाएको हुलिया रहेको भक्तपुर प्रहरीले जानकारी दिएको छ ।
अन्दाजी ३० वर्षको कृष्ण गुरुङ भनिएका व्यक्तिको आफन्त, परिवारजनलाई प्रहरीको सम्पर्कमा आउन प्रहरी नायब उपरीक्षक गिरीले अनुरोध गरेका छन् ।

Copyright © 2018 www.indepth.com.np. सर्वाधिकार सुरक्षित | E-mail: eindepth@gmail.com | Contact : 9841273000 | Regd. No. : 143065-072/073

Design & Hosted By SITEMANDU

Powered By GO BHAKTAPUR.COM & LINK BHAKTAPUR.COM

error: Content is protected !!