Connect with us

POLITICS

प्रम ओलीलाई भक्तपुर कांग्रेसको विरोधपत्र

Avatar

Published

on

भक्तपुरमा प्रमुख जिल्ला अधिकारी हुमकला पाण्डेलाई प्रधानमन्त्रीको नाउँको विरोधपत्र बुझाउँदै नेपाली कांग्रेस भक्तपुरका सभापति दुर्लभ थापा । तस्बिर : इन डेप्थ

भक्तपुर । नेपाली कांग्रेस भक्तपुरले सूचना प्रविधि विधेयकको विरोध गर्दै आइतबार प्रधानमन्त्री केपी शर्मा ओलीलाई पत्र पठाएको छ ।
भक्तपुर कांग्रेसका जिल्ला सभापति दुर्लभ थापाद्वारा हस्ताक्षरित विरोध पत्र प्रमुख जिल्ला अधिकारीमार्फत प्रधानमन्त्री ओलीलाई पठाइएको हो ।
भक्तपुर कांग्रेसले आइतबार विरोध प्रदर्शन गर्दै भक्तपुरका प्रमुख जिल्ला अधिकारी हुमकला पाण्डेलाई विरोध पत्र बुझाएको छ ।
विरोधपत्रमा ओली सरकार अधिनायकवादी बाटोतर्फ अग्रसर रहेको औंल्याइएको छ ।
विधेयकले संविधान प्रदत्त नागरिक अधिकार अपहरण गर्न लागेकोप्रति नेपाली कांग्रेसका ध्यानाकर्षण भएको उल्लेख गरिएको विरोधपत्रमा भनिएको छ, ‘विधेयकमा समावेश गरिएको फोन ट्यापिङ गर्न सक्ने, सामाजिक सञ्जालमा कसैलाई व्यंग्य गरेवापत पाँच वर्ष जेल र १५ लाख जरिवाना तिर्नुपर्ने जस्ता प्रावधानले व्यक्तिगत गोपनीयताको संवैधानिक अधिकार हनन हुने र आलोचना एवं व्यंग्य गर्न पाउने नागरिकको अभिव्यक्ति स्वतन्त्रताको हत्या हुने निश्चित छ ।’
नागरिकको अभिव्यक्ति स्वतन्त्रता र व्यक्तिगत गोपनीयताको अधिकार लोकतन्त्रको आत्मा हुने भन्दै भक्तपुर कांग्रेसका सभापति दुर्लभ थापाले संविधानले प्रदान गरेको नागरिक अधिकार कुण्ठित गर्ने विधेयक अविलम्ब फिर्ता गर्न जोडदार माग गरेका छन् ।
भक्तपुर नगरपालिका १ दूधपाटीबाट सुरु गरिएको विरोध प्रदर्शन भक्तपुर दरबार क्षेत्रस्थित जिल्ला प्रशासन कार्यालयमा समापन गरिएको थियो । विरोध प्रदर्शनलगत्तै प्रमुख जिल्ला अधिकारी पाण्डेलाई विरोध पत्र बुझाइएको हो ।
विरोधपत्र बुझ्दै प्रमुख जिल्ला अधिकारी पाण्डेले उक्त विरोधपत्र सम्बन्धित निकायमा पठाइने जानकारी दिइन् ।

Copyright © 2018 www.indepth.com.np. सर्वाधिकार सुरक्षित | E-mail: eindepth@gmail.com | Contact : 9841273000 | Regd. No. : 143065-072/073 |

Design & Host By SITEMANDU.COM

Powered By GO BHAKTAPUR.COM