Connect with us

BUSINESS

चार युवाले बनाए टचलेस ह्याण्ड स्यानिटाइजर मेसिन

Avatar

Published

on

टचलेस ह्याण्ड स्यानिटाइजर प्रयोग गरेर देखाउँदै दीपेश वेंजू । तस्बिर : ईश्वरकाजी खाइजू

भक्तपुर । कोरोना भाइरस संक्रमण नियन्त्रण तथा व्यवस्थापन गर्न सरकारले घोषणा गरेको लकडाउनकै बीच भक्तपुरका चार युवाले सेन्सरयुक्त (टचलेस) ह्याण्ड स्यानिटाइजर मेसिन बनाएका छन् । भक्तपुरका दीपेश वेंजू, विकास प्रजापति, रत्नसुन्दर हाकुदुवाल र उमेश यादवले लकडाउनकै बीच उक्त मेसिन निर्माण पूरा गरेका हुन् ।
चार युवामध्ये तीनजना त प्राविधिक हुन् । उमेश इलेक्ट्रोनिक्स एण्ड कम्युनिकेसन इञ्जिनियर, रत्नसुन्दर आईटी इञ्जिनियर र विकास अटोमोबाइल ओभरसियर हुन् । दीपेश अटो तथा मिडिया व्यवसायी छन् । चार लिटर क्षमताको कन्टेनर भएको उक्त सेन्सरयुक्त ह्याण्ड सेनिटाइजर मेसिनबाट प्रतिसेकेन्ड एक मिलिलिटर स्यानिटाइजर प्रवाह हुने दीपेशले जानकारी दिए । ‘सेन्सरयुक्त भएकाले मेसिनबाट हात नझिकेसम्म निरन्तर स्यानिटाइज भइरहन्छ’, उनले भने ।
उनका अनुसार उक्त मेसिनमा स्यानिटाइजरमात्रै होइन, स्याम्पु र झोल साबुनसमेत राखेर प्रयोग गर्न सकिन्छ । करिब एक फिट चौडाइ र डेढ फिट उचाइ भएको उक्त मेसिन आवश्यकता एवं ठाउँअनुसार भित्तामा झुन्ड्याउन र टेबलमा राख्न मिल्ने गरी बनाइएको विकास बताउँछन् ।
उनले आफूहरुले तयार गरेको सेन्सरयुक्त ह्याण्ड स्यानिटाइजर मेसिन नेपालकै पहिलो भएकोसमेत दावी गरे ।

कहाँबाट आयो मेसिन बनाउने सोच ?

लकडाउनकै बीच एकदिन चारजना साथीहरुको भेटघाट हुँदा कोरोना भाइरसले सबै क्षेत्र लथालिंग छ, व्यापार घाटा चुलिँदो छ, के गर्ने भन्ने छलफल हुँदा सेन्सरयुक्त ह्याण्ड स्यानिटाइजर बनाउने सोच आएको दीपेशले सुनाए ।
विकासले सुरुमा टनेल स्यानिटाइजर बनाउने प्रस्ताव गरेको बताउँछन् । तर टनेल स्यानिटाइजरको प्रयोग कममात्र हुने भएकाले बढी प्रयोग हुनसक्ने ह्याण्ड स्यानिटाइजर मेसिन बनाउने निष्कर्षमा पुगेको दीपेशले स्पष्ट पारे ।
ह्याण्ड स्यानिटाइजरमा पनि हातले छोइरहन नपर्ने सेन्सरयुक्त उपकरण बनाउनेमा चारैजना सहमत भएको इलेक्ट्रोनिक्स एण्ड कम्युनिकेसन इञ्जिनियर उमेश सुनाउँछन् । ‘सर्वसाधारणको जनस्वास्थ्यलाई ख्याल गरेर छुन नपर्ने तथा कोरोना भाइरस संक्रमण हुनबाट बच्न र बचाउन ह्याण्ड स्यानिटाइजर मेसिन बनाएका छौं’, उनले भने ।
इञ्जिनियर उमेशले सेन्सरयुक्त टनेल स्यानिटाइजरसमेत निर्माण गर्ने कार्य पूरा भइसकेको जानकारी दिए ।
उक्त ह्याण्ड स्यानिटाइजर परीक्षणको लागि हाललाई २० वटा बनाइसकेको आईटी इञ्जिनियर रत्नसुन्दरले बताए । ती सबै परीक्षणको रुपमा प्रयोग गर्नसमेत दिइएको उनको भनाइ थियो । उक्त परीक्षणपछि माग भए उद्योग नै स्थापना गरी व्यवसायिक रुपमा सेन्सरयुक्त ह्याण्ड स्यानिटाइजर मेसिन उत्पादन गर्ने उनीहरुले बताएका छन् ।

Copyright © 2018 www.indepth.com.np. सर्वाधिकार सुरक्षित | E-mail: eindepth@gmail.com | Contact : 9841273000 | Regd. No. : 143065-072/073 | Design & Host By SITEMANDU Powered By : www.gobhaktapur.com